2024 жылдың 20 сәуірі күні университеттің №7 оқу ғимаратының «Профессор Ю» атындағы дәрісханасында Тілдік пәндер кафедрасының доценттері Т.Қ.Зайсанбаев пен Ф.Б.Кожахметова, лекторы А.Р.Абдықадырова және Балалар жасындағы стоматология кафедрасының доценті Р.И.Құлмамбетов «Халық композиторы, әнші, қазақ жеріндегі цирк өнерінің негізін қалаушы Балуан Шолақ (Нұрмағамбет) Баймырзаұлының туғанына 160 жыл толуына орай “Сұрасаң менің атым Балуан Шолақ” атты әдеби-музыкалық кеш өткізді.
Әдеби-музыкалық кешті ашқан Тілдік пәндер кафедрасының доценті Т.Қ.Зайсанбаев бүгінгі кештің маңызына қысқаша тоқтала келіп, сөз кезегін Балуан Шолақтың өмірі мен шығармашылығы туралы баяндама дайындап келген жалпы медицина мектебі 2-курс студенттері Сейсенғалиқызы Арайлым мен Ералхан Мерейге берді. Олар «Халқымнан көріп жүрмін қадір-құрмет …» деп аталатын баяндамаларында Балуан Шолақтың өмірі мен шығармашылығына жан-жақты тоқталды.
Кешті жүргізген Қазақстан Республикасының еңбек сіңірген өнер қайраткері, белгілі әнші Жолман Құжиманов Балуан Шолақтың әндерінің шығу тарихына қысқаша тоқталып, бірнеше әнін өзі орындап берді. Сондай-ақ осы кешке арнайы келген ақ Құрманғазы атындағы қазақ ұлттық консерваториясының студенттері Жаппар Абылай мен Айдос Санязбек те Балуан Шолақ әндерін нақышына келтіріп шырқады. Дәріс концертті жүргізген Жоламан Нұртайұлы Балуан Шолақ бабамыздың көпшілік біле бермейтін қыр-сыры туралы көптеген қызықты мәліметтер берді. Үш әншінің құлаш құрышын қандыра шырқаған әндеріне көрермендер дән риза болды.
Балуан Шолақ бабамыз туралы осындай кеш өтетінінен хабарланған Әл-Фараби атындағы ҚазҰУ, А.Байтұрсынұлы атындағы Тіл білімі кафедрасының оқытушылар М.Тойғанбаева, Р.Наралиева және Ә.Кәкенова дайындық бөлімінде оқитын шетелдерден қандастарымызды ерте келді. Қазақ әндеріне сусап жүрген қандастарымызға бұл кештің ұнағанына күмән жоқ.
Кеш соңында доцент Т.Қ.Зайсанбаев кешті керемет етіп жүргізген Жоламан Нұртайұлы мен кештің өтуіне белсене атсалысқан Құрманғазы атындағы қазақ ұлттық консерваториясының студенттері Жаппар Абылай мен Айдос Санязбекке және баяндама жасаған студенттер Сейсенғалиқызы Арайлым мен Ералхан Мерейге Корпоративтік даму бойынша проректор Ұ.М.Датхаевтың Алғыс хаттарын табыстады.
Тілдік пәндер кафедрасының доценті, ф.ғ.к. Ф.Б.Қожахметова
